Ölgerðin hefur hlotið ISO 14001 vottun, alþjóðlega viðurkenndan staðal fyrir umhverfisstjórnun. Vottunin staðfestir að Ölgerðin starfar samkvæmt umhverfisstjórnunarkerfi sem stuðlar að ábyrgum rekstri og stöðugum umbótum. Umbótamenning er lykilþáttur í starfsemi Ölgerðarinnar og eitt helsta verkfæri til að ná fram stöðugum framförum í sjálfbærni og rekstri. Með stöðugum umbótum drögum við úr sóun, kolefnisspor minnkar og kostnaður lækkar. Ölgerðin vinnur að því að draga markvisst úr loftslags- og umhverfisáhrifum í starfsemi með því að minnka kolefnislosun, auka orkunýtni og bæta nýtingu auðlinda.
Vottunin er mikilvægur áfangi í sjálfbærnivegferð Ölgerðarinnar og endurspeglar skýra áherslu fyrirtækisins á ábyrga nýtingu auðlinda og umhverfismál. Hún styrkir jafnframt áframhaldandi vinnu við að þróa reksturinn með sjálfbærni að leiðarljósi.
ISO 14001 vottunin bætist í hóp þeirra vottana sem Ölgerðin hefur þegar hlotið, sem eru ISO 9001, FSSC 22000 og ÍST 85:2012.